Støre krev svar frå Solberg om virusberedskapen
Statsministeren må avklare om helsestyresmaktene har fullmakter, planar og pengar til å møte ei eventuell spreiing av koronaviruset til Noreg, krev Ap.
– Ei rekkje land går gjennom beredskapen sin i møte med ei spreiing av koronaviruset. Kan statsministeren forsikre om at helsestyresmaktene har dei nødvendige fullmaktene, planane og dei økonomiske ressursane til å møte ei spreiing av koronaviruset i Noreg?
Det skriv Arbeidarpartiets leiar Jonas Gahr Støre onsdag kveld i eit brev til statsminister Erna Solberg (H). Det er hittil ikkje påvist virussmitte hos personar i Noreg, men virustilfelle er no registrert i ei rekkje europeiske land.
Støre viser til at spreiinga av det nye koronaviruset, som gir opphav til sjukdommen covid-19, har fått Verdshelseorganisasjonen (WHO) til å meine at vi kan stå overfor ein pandemi.
– Det betyr at ein må pårekne spreiing av viruset over landegrenser i alle delar av verda. Folkehelseinstituttet varslar at ein må pårekne at viruset òg kan smitte i Noreg, konstaterer Støre.
Den tidlegare helseministeren seier samtidig at Noreg har eit sterkt og moderne smittevern. Han minner om at Noreg sist møtte ein pandemi under den såkalla svineinfluensa-epidemien for over ti år sidan.
Sjølv om det førebels ikkje er påvist virussmitte hos personar i Noreg, har Folkehelseinstituttet bede helsestellet om å førebu seg på ein alvorleg epidemi.
Ein pandemi er eit sjukdomsutbrot som rammar svært mange menneske og spreier seg over store delar av verda, ifølgje Folkehelseinstituttet.
(©NPK)
Statsminister Erna Solberg (H) må avklare at den norske beredskapen er tilstrekkeleg om det nye koronaviruset spreier seg til Noreg, krev Arbeiderparti-leiar Jonas Gahr Støre.
Foto: Vidar Ruud / NTB scanpix