Klargjør siden...

Strid om prest til taterane

(NPK-NTB): Den norske kyrkje ønsker å opprette ei eiga presteteneste for taterane/romanifolket etter å ha sagt unnskyld for behandlinga minoriteten har fått. Romanifolket ønsker heller ei annan form for støtte.

– Kyrkja leverer berre ord, ord, ord. Sidan dei kom med unnskyldninga til romanifolket på kyrkjemøtet i 2000, har dei ikkje gjort anna enn å snakke, seier styreleiar Linda Aleksandersen i Landsorganisasjonen for Romanifolket (LOR) til Vårt Land. Ho seier at dei verken treng eller har etterspurt ei presteordning.

– Vi har to svært konkrete ønsker. Kyrkja bør vere pådrivar for ein kollektiv erstatningsordning for romanifolket og for arbeidet med å etablere ein eigen stad, eit senter for romanifolket, seier ho.

Kyrkja seier den skal sjå nærmare på desse ønska. Assisterande direktør Gerd Karin Røsæg i Kyrkjerådet forklarer kva kyrkjeleiinga har tenkt då arbeidet med ei eiga presteteneste blei sett i gang:

– Kyrkja har sagt unnskyld til romanifolket og taterane for behandlinga som blei dei til del. Men unnskyldningane frå to kyrkjemøte har ikkje nådd langt nok ut. Derfor prøver vi no å tilby kyrkjelege tenester, seier Røsæg. (©NPK)

Annonse