Tiltalte i Monika-saka hevdar han er uskuldig

(NPK-NTB): Den 34 år gamle litauaren som er tiltalt for å ha drepe Monika Sviglinskaja (8), held fast på at han er uskuldig i eit intervju med VG.

npk@npk.no

Publisert: 19.05.2016 kl 08:12

– Eg har inga tru på at ho tok livet sitt. Det er nokon som har drepe henne, men det var ikkje meg, seier han til avisa, som fekk intervjue han på besøksrommet i Kongsvinger fengsel i forkant av rettssaka som startar i Nordhordland tingrett i Bergen måndag 30. mai.

Åtteåringen vart funnen død heime i leilegheita på Sotra, der ho budde saman med mora. Etter ni månader konkluderte politiet med at det ikkje kunne slåast fast at det hadde skjedd noko straffbart, og at barnet måtte ha tatt sitt eige liv. Tre år etter vart den tidlegare sambuaren til mora sikta for forsettleg drap på jenta.

DNA-materiale og elektroniske spor vil bli ført som bevis i retten.

– Dette er vanskeleg. Eg er ikkje nokon DNA-ekspert, men eg meiner DNA-bevisa har ei naturleg forklaring. Eg budde i leilegheita fram til fem veker før Monika vart funnen død. Ho kan ha brukt laptopen som stod igjen etter meg og på den måten fått DNA overført, meiner 34-åringen.

To engelske DNA-ekspertar, som har vore sakkunnige for politiet i saka, har konkludert med at DNA-et som vart funne på jenta, mest sannsynleg stamma frå direkte kontakt mellom dei to. Litauaren meiner likevel at rapporten ikkje avviser at det kan dreie seg om transportering av DNA frå då han budde i leilegheita.