To arrestert for hærverk mot jødisk gravplass i Danmark
To menn er arresterte for hærverket mot ein jødisk kyrkjegard i Randers i Danmark i helga. Ein dommar skal avgjere om dei to skal varetektsfengslast.
Mennene på 27 og 38 år er sikta for brot på den såkalla rasismeparagrafen i straffelova og for hærverk.
Påtalemakta vil onsdag be retten i Randers om at dei to blir varetektsfengsla, opplyser Østjyllands politi onsdag.
Siktinga dreier seg delvis om hærverk på Randers Østre Kirkegård natt til laurdag, der totalt 84 gravsteinar vart måla med grøn måling. Den andre delen dreier seg om hærverk mot ein bygning i Randers, der svart og grøn måling vart kasta mot fasaden til bygningen.
Hærverket ved gravlunden, som vart oppretta på 1800-talet, vart meld inn laurdag - som var årsdagen for krystallnatta. Denne markerte i 1938 starten på jødeforfølginga i Tyskland.
Det vart òg utført hærverk mot heimen til jødar, synagogar og andre bygningar i alle dei nordiske landa, mellom anna ved at vegger vart tagga.
Hærverket i Danmark, Noreg, Sverige og Finland i samband med krystallnatta var truleg koordinert og meint som ein maktdemonstrasjon, har terrorforskar Magnus Ranstorp sagt til danske avisa Information.
(©NPK)