Tønseth vann på Beitostølen, Northug diskvalifisert for skøyting

Tønseth og Iversen var i ein klasse for seg gjennom mesteparten av løpet, stort sett med førstnemnde eit lite hakk føre.

Mot slutten auka berre avstanden til feltet bak. Røthe og Martin Johnsrud Sundby var i tøff kamp om tredjeplassen, og til slutt stakk Røthe av med pallplassen med marginen til 8,2 sekund.

Hans Christer Holund vart frågått med 1.07,4 minutt og tok 5.-plassen. Etter han følgde Johannes Høsflot Klæbo.

Northug ute

For Petter Northug vart langrennsopninga på Beitostølen ei god treningsøkt. Trønderen vart diskvalifisert for å ha teke fleire skøytetak i klassiskløpet.

- Det vart 15 kilometer duatlon for meg. Eg burde vore diska fleire stader. Det var både mykje skøyting og ein del staking, innrømde Northug sjølv overfor NRK.

Han var òg eit stykke bak dei aller beste då han gjekk i mål fredag. 42 sekund skilde opp til dåverande leiar Erland Kvisle.

Tungt

- Det gjekk tungt og treigt dei to siste rundane, og det var jo som spådd, det. Eg fekk ei fin treningsøkt, men det er jo kjedeleg å gå når forma er dårleg, sa Northug.

Han var frykteleg kritisk til eiga form i opptakta til sesongopninga og antydde at skikarrieren kan vere over før jul om han ikkje kjem i form. Men 32-åringen gir ikkje opp enno.

- Eg skal konkurrere litt, trene litt og vonleg respondere på det. Og gjer eg det, så trur eg at vegen opp til sprint er kortare enn ein skulle tru. Men nivået der er vorte brutalt dei siste åra, så ikkje noko er sjølvsagt, sa Northug.

(©NPK)

Petter Northug følgde ikkje reglane under langrennsopninga på Beitostølen.
Foto: Ørn Borgen / NTB scanpix