Torp mista ni av ti passasjerar i juni
Etter at Torp lufthamn i juni igjen opna for trafikk, reiste 21.160 til eller frå flyplassen, ein nedgang på dryge 89 prosent frå same månad i fjor.
I alt var det 172.696 færre passasjerar innom flyplassen enn i juni 2019.
8.995 passasjerar reiste innanriks, der nedgangen var på 71,9 prosent. Utanriksflygingar hadde både flest passasjerar og størst nedgang, med høvesvis 12.165 og 92,5 prosent.
– Trafikken i juni var på cirka 10 prosent av ein normal juni-månad. Vi forventar no cirka det dobbelte i juli, og så ser vi for oss at trafikken aukar sakte, men sikkert månad for månad i tida framover, seier marknads- og kommunikasjonssjef Tine Kleive-Mathisen ved Torp lufthamn i ei pressemelding.
No er Widerøe i gang med ruter til Bergen og Stavanger, i tillegg til sommarruter som går direkte til Bodø, Evenes og Tromsø. Wizz Air har brorparten av utanrikstrafikken, med ruter til fleire polske byar, i tillegg til litauiske Vilnius, Riga i Latvia og rumenske Bucuresti.
Kleive-Mathisen understrekar at oppstarten skjer i tett dialog og samarbeid med kommuneoverlegen med tanke på smitteverntiltak og politiet med tanke på innreiseavgrensingar.
Ryanair starta opp igjen med flygingar i slutten av juni, med ei rute til Polen. I starten av juli har selskapet òg teke opp igjen ruteflyging til fleire andre europeiske storbyar.
(©NPK)
Drygt 89 prosent færre passasjerar reiste til eller frå Torp lufthavn i juni i år samanlikna med tilsvarande månad i fjor. Foto: Berit Roald / NTB scanpix