Tour de Ski-troppen blir teke ut denne veka
Mange langrennsløparar kjempar om plass i den norske troppen til Tour de Ski, som startar i romjula.
Blant dei er samanlagtleiarane etter opningsrenna i Skandinavisk Cup, Martin Løwstrøm Nyenget og Anna Svendsen.
Tromsø-løpar Svendsen vann sprinten på fredag og følgde opp med niandeplass på 10 kilometer fri teknikk søndag. Nyenget vart nummer seks på sprinten og fire på 15-kilometeren i fri teknikk.
Fleire av landslagsløparane har signalisert at det kan vere aktuelt å droppe det tøffe rennprogrammet før og etter nyttår for å fokusere på VM i Seefeld. Det kan opne for løparar som Nyenget og Svendsen.
Johaug i tenkjeboksen
Det er venta at Skiforbundet presenterer den norske Tour-troppen i løpet av denne veka. Uttaket kan komme så tidleg som tysdag eller onsdag.
I samband med verdscuprennet til helga i Davos sa Therese Johaug at heller ikkje ho er heilt sikker på at det blir Tour-start.
Johannes Høsflot Klæbo har fleire gonger sagt at det freistar å gå Touren, men at han ventar med å ta den endelege avgjerda til rett før det norske uttaket. 22-åringen vil vurdere totalbelastinga.
Haga-nei
Av dei norske kvinnene er den dobbelte OL-meisteren Ragnhild Haga den som har vore tydelegast på at det ikkje blir aktuelt å gå Tour de Ski. Åsen-løparen hadde suksess med å droppe Touren før vinterleikane i Sør-Korea sist sesong, og ho vel truleg same opplegg før Seefeld-VM.
Ein annan dobbelt OL-vinnar, Simen Hegstad Krüger, har òg sagt at han vurderer å droppe renna i Italia, Sveits og Tyskland.
Martin Johnsrud Sundby sa på si side til NRK søndag at han er overraska over at enkelte vel å droppe det som merksemdsmessig for langrennsporten er nokre av dei viktigaste renna i løpet av vinteren.
(©NPK)
Anna Svendsen har imponert i Skandinavisk Cup og er aktuell for Tour de Ski. Foto: Terje Pedersen / NTB scanpix