Tre personar til sjukehus etter trafikkulykke i Samnanger
Ein person er frakta med luftambulanse til Haukeland sjukehus etter ei trafikkulykke i Rolvsvåg i Samnanger i Hordaland.
To andre personar blir køyrde til sjukehus i ambulanse. Totalt var tre bilar involverte i ulykka.
- Ein varebil ligg på sida, medan to bilar har skadar i front. Vi veit ikkje enno kva som har skjedd, seier operasjonsleiar Terje Magnussen i Vest politidistrikt til NTB.
Skadeomfanget til personane er ukjent, men ifølgje operasjonsleiar kom alle seg ut av bilane på eiga hand.
Politiet melde om ulykka like etter 17.30 fredag kveld.
- Det er oljesøl og glatt på vegen etter ulykka, opplyser Magnussen.
(©NPK)