Trump: USA forhandlar med Tyrkia i Syria-konflikten

- Vi følgjer med, og vi forhandlar, og vi prøver å få Tyrkia til å gjere det rette, fordi vi ønsker å stanse krigar uansett, på humanitært grunnlag, sa Trump i Det kvite hus onsdag, der han hadde besøk av president Sergio Mattarella frå Italia.

Trump understreka at ståstaden til USA no er «strategisk briljant», sidan amerikanske soldatar er trekte ut og utanfor rekkevidde for krigshandlingar.

- Det er ikkje grensa vår, og vi bør ikkje miste liv, sa Trump om situasjonen ved den syrisk-tyrkiske grensa, der amerikanske styrkar stod fram til førre veke.

Presidenten kommenterte òg samarbeidsavtalen som kurdisk milits nordaust i Syria har inngått med regimet i Damaskus. Militsen hadde fram til førre veke støtte frå USA og er no mål for den tyrkiske militæroffensiven.

- Syria vernar kurdarane. Det er bra, sa Trump. Trump sa òg at han ønsker Russland og Syria «lykke til» i samarbeidet sitt, og antyda at både Damaskus og Moskva hatar IS meir enn det Washington gjer.

- Eg brukar heller alltid økonomisk makt i staden for militær makt, fordi folk ikkje blir drepne med økonomisk makt, sa Trump i ei generell fråsegn om sanksjonar og toll, etter at han tidlegare i veka påla Tyrkia sanksjonar fordi landet har gått over grensa til Syria.

- Tyrkia er eit NATO-land. Vi skal kunne komme overeins med ein NATO-medlem, sa Trump.

(©NPK)

President Donald Trump under møtet med president Sergio Mattarella frå Italia i Det kvite hus onsdag. Foto: AP / NTB scanpix