Trump har anerkjent Golanhøgdene som ein del av Israel

Ei erklæring om USAs anerkjenning vart underteikna av Trump måndag, i samband med at han møtte Israels statsminister Benjamin Netanyahu i Det kvite hus.

Trump varsla tidlegare denne månaden at USAs syn på Golanhøgdene ville bli endra.

- Etter 52 år er det på høg tid at USA fullt ut anerkjenner Israels suverenitet over Golanhøgdene, som er kritisk strategisk og sikkerheitsmessig viktig for staten Israel og stabiliteten i regionen, skreiv presidenten på Twitter.

Tidlegare har FNs tryggingsråd, med støtte frå USA, slått fast at Golanhøgdene er ulovleg okkupert og annektert.

Golanhøgdene er eit 1.200 kvadratkilometer stort høgdedrag sørvest i Syria, men store delar av området vart okkupert av Israel i 1967. Israel har etablert rundt 30 busetjingar i det okkuperte området, i strid med folkeretten.

(©NPK)

Ein FN-soldat i eit vakttårn ved delelinja mellom Syria og den israelskokkuperte delen av Golanhøgdene i 2013. Foto: Ariel Schalit / AP / NTB scanpix