Walmart fjernar våpen og ammunisjon frå hyllene i USA
Varehuskjeda Walmart fryktar opptøyar og plyndring og fjernar våpen og ammunisjon frå hyllene i butikkane sine i USA.
Butikkjeda tok avgjerda etter to netter med opptøyar og portforbod i Philadelphia, der ein psykisk sjuk 27-åring vart skoten og drepen av politiet måndag.
Frykt for uro i samband med presidentvalet neste veke har òg bidrege til at Walmart har bestemt seg for mellombels å fjerne pistolar, revolverar og rifler frå hyllene.
Kundane skal framleis få kjøpe våpen og ammunisjon dersom dei spør om det, opplyser Walmart.
Hittil i år er det selt 17 millionar handvåpen i USA, meir enn noko anna år i historia.
(©NPK)
Ein tilsett ryddar opp etter at ein Walmart-butikk i Philadelphia vart plyndra under opptøyane tidlegare i veka. Foto: AP / NTB