Dette skjedde i OL i natt
Ingen norske medaljekandidatar har vore i aksjon, men det har komme fleire interessante nyheiter frå OL-byen Pyeongchang mens du sov:
Svendsen ankermann
Det blir Emil Hegle Svendsen som går den siste etappen under skiskyttarstafetten i dag. Det melde Eurosport i natt. Ettersom Martin Fourcade går tredje etappe for Frankrike, er Johannes Thingnes Bø sett opp mot han.
Lars Helge Birkeland skal gå første etappe, mens Tarjei Bø skal gi broren Johannes eit så godt utgangspunkt som mogleg.
Tremilslaget er klart
Det blir som venta Marit Bjørgen, Ingvild Flugstad Østberg, Ragnhild Haga og Heidi Weng som går 30 kilometer klassisk søndag, bekrefta presseansvarleg i Skiforbundet Gro Eide.
Det er dei fire same utøvarane som gjekk dei to første individuelle konkurransane, 10 kilometer og skiathlon, tidlegare i vinterleikane.
OL-gull i natt
Det vart delt ut to medaljar i natt. I skicrossfinalen vart det for tredje OL på rad canadisk gull på kvinnesida. Kelsey Serwa vann framfor lagvenninne Brittany Phelan. Sveitsiske Fanny Smith kapra bronsen framfor svenske Sandra Näslund.
På morgonkvisten vart det klart at 15 år gamle Alina Zagitova vann det første OL-gullet for OAR (utøvarar frå Russland). Ho vann framfor venninne og treningspartnar Jevgenija Medvedeva. Canadas Kaetlyn Osmond tok bronse
IOC trur på curlingbronse før OL er over
I natt sa talsmannen for Den internasjonal olympiske komité (IOC), Mark Adams, at han er sikker på at Magnus Nedregotten og Kristin Skaslien vil få sin OL-bronse før vinterleikane blir avslutta søndag.
Curlingduoen tapte bronsefinalen mot OAR, men Aleksandr Krusjelnitskij testa positivt for det forbodne stoffet meldonium.
(©NPK)
Foto: Lise Åserud / NTB scanpix
Foto: Cornelius Poppe / NTB scanpix
Foto Andreas Hillergren / TT / NTB scanpix
Foto: Terje Pedersen / NTB scanpix