Høgsterett: Reineigarar har ikkje eigedomsrett til Stjernøya
(NPK-NTB): To reindriftsgrupperingar har ikkje eigedomsrett til delar av Stjernøya utanfor Altafjorden i Finnmark, slår Høgsterett fast gjennom å forkaste anken i saka.
To rettsinstansar har tidlegare kome fram til at reindrifta har opparbeidd seg bruksrett, men ikkje eigedomsrett til den mineralrike øya, som også har hatt anna busetjing og gruvedrift.
Reindriftssamane har i ei årrekke brukt øya som sommarbeite. I avgjerda til Høgsterett blir det trekt fram at staten har utøvd eigarråderett over Stjernøya sidan 1700-talet, og dei fastbuande hadde også nytta utmarksressursane på øya.
Bruken til samane har etter retten sitt syn dermed ikkje vore tilstrekkeleg omfattande og dominerande til å gi dei krav på eigedomsrett «gjennom alders tids bruk». Retten kan heller ikkje legge til grunn at reindriftssamane var dei opphavlege eigarane av øya, då dei ikkje har erverva eigedomsrett etter prinsippa om okkupasjon av eigarlaust land. (©NPK)