Putin styrkjer banda til Bulgaria
President Vladimir Putin i Russland styrkjer banda til Bulgaria som ledd i innsatsen for å betre banda til tidlegare austblokkland i EU.
Putin og den bulgarske kollegaen hans Rumen Radev la vekt på dei felles slaviske røtene til dei to landa då dei to møttest i sommarresidensen til Putin i Sotsji tysdag.
Russland har den siste tida prøvd å styrke banda til tidlegare austblokkland som no er medlemmer av EU, som for eksempel Ungarn og Slovakia, og behalde ei grad av innverknad i den tidlegare interessesfæren sin.
Dette skjer mens forholdet til Vesten generelt, inkludert EU, er på veg mot frysepunktet som følgje av konflikten i Ukraina og skuldingar om innblanding i val i fleire land.
Russland har også prøvd å sikre innverknad i land som håpar å bli tatt opp som medlemmer i EU, som Serbia.
På møtet feira dei to presidentane 140-årsjubileet for frigjeringa av Bulgaria og sigeren i den russisk-tyrkiske krig.
- Det var på grunn av sigeren til Russland at Bulgaria kom på det europeiske kartet, og målet med besøket mitt er dialog mellom våre to land til eit høgast mogleg nivå, sa Radev.
(©NPK)
President Vladimir Putin i Russland møtte president i Bulgaria Rumen Radev i Sotsji. Foto: Alexander Zemlianichenko / AP / NTB scanpix