Smiguns «dopingsak» opp i CAS
(NPK-NTB): Idrettens valdgiftsrett (CAS) skal denne veka starte behandlinga av dopingskuldingane mot Kristina Smigun. Det kan ende med at fleire norske utøvarar får ettersendt OL-medaljar.
Estlandske Smigun vann to gull i Torino-OL for snart elleve år sidan.
Fleire norske løparar kan få OL-medaljar i posten viss ho blir funnen skuldig i brot av dopingreglane. WADA stadfestar overfor TV 2 at behandlinga skal starte i Lausanne denne veka.
– WADA er ikkje ein part i denne saka, men vi har fått beskjed om at høyringa i CAS startar denne veka, seier Beckie Scott, leiar av WADAs utøvarkomité, til kanalen.
Canadiske Scott tok sjølv OL-gull i 2002 etter at russiske Larisa Lazutina og Olga Danilova blei diskvalifiserte for doping.
– WADA vil få beskjed når ei avgjerd blir teken, og då vil vi kunne kommentere saka. Avhengig av kor kompleks saka er, kan det ta litt tid før vi får ei endeleg avgjerd, seier ho.
Kompleksiteten i saka er at advokatane til Smigun har sådd tvil om både prøveresultata og testmetodane til IOC. Og ettersom det ikkje ligg føre ein dopingdom mot henne, handlar saka om rettssikkerheita til Smigun.
IOC har ikkje villa kommentert saka på over eitt år av frykt for at dette kan førehandsdømme henne.
Smigun tok to OL-gull i Torino-OL. Både A- og B-prøvene var positive, og Smigun skulle derfor normalt bli fråteken gulla. I så fall får Marit Bjørgen OL-gull, medan Kristin Størmer Steira blir to OL-bronsar rikare. (©NPK)