Syriske regjeringsstyrkar fortset å rykke fram i Daraa-provinsen
Regjeringsstyrkar har tatt kontroll over nye område i Daraa-provinsen sør i Syria. Dei kontrollerer no 90 prosent av provinsen, ifølgje SOHR.
Måndag tok regjeringsstyrkar kontroll over ei rekke landsbyar vest i Daraa, ifølgje eksilgruppa Syrian Observatory for Human Rights (SOHR).
Nokon av landsbyane blei tatt kontroll over som følgje av kampar med opprørarar. Frå andre landsbyar trekte opprørarar seg tilbake etter at lokale avtaler om overgiving blei inngått.
Også statlege syriske medium melder at regjeringsstyrkar måndag tok kontroll over nye område i Daraa.
Ifølgje SOHR kontrollerer no regjeringsstyrkar 90 prosent av provinsen. Då regjeringsstyrkar med russisk luftstøtte begynte offensiven i provinsen 19. juni, kontrollerte dei til samanlikning berre 30 prosent, ifølgje eksilgruppa.
Regjeringsstyrkar kunne torsdag heise flagget i byen Daraa i provinsen med same namn. Det skjedde sju år etter at byen blei tatt av opprørarar.
Fallet til Daraa var ein viktig symbolsk siger for president Bashar al-Assad.
Byen er kjent som vogga til den syriske revolusjonen, ettersom det var der dei første protestane mot Assad byrja i 2011 grunna at tryggingsstyrkar mishandla fleire tenåringar.
(©NPK)
Bildet viser syriske regjeringsstyrkar i Daraa-provinsen 7. juli. Bildet er frå det statlege nyheitsbyrået SANA. Foto: AP / NTB scanpix