Fastlimte klimaaktivistar fjerna frå Noregs Bank

Meldinga om markeringa kom klokka 14.30 fredag ettermiddag. Det var rundt ti demonstrantar, ifølgje politiet.

- Dei var både i foajeen og utanfor Noregs Bank. Dette var ei markering som ikkje var meld. Dei var i ferd med å lime seg fast, opplyser operasjonsleiar Tor Jøkling i Oslo politidistrikt til NTB.

- Svik mot framtida

Demonstrantane hadde plakatar med bodskapar som «Oljepenger - Svik mot framtida» og «Vi drukner andre nasjoner», og dessutan krav om at Oljefondet trekker seg ut av kolverksemd.

Dei tryggingsansvarlege i Noregs Bank ønskte å få bort demonstrantane frå foajeen, og dessutan fleire som sperra inn- og utgangen i bygningen, ifølgje politiet.

- Vi fekk ein grei dialog med demonstrantane. Med litt naglelakkfjernar klarte vi å løyse opp limet. Dei som var på utsida, fekk tildelt eit område der dei kunne stå, seier operasjonsleiar Jøkling.

Høg terskel for ytring

- Vi har låg terskel for at folk skal kunne få ytre seg, legg operasjonsleiaren til.

Demonstrantane spraya òg ei slags måling på vindauga. Ifølgje politiet er det uvisst om Noregs Bank vil politimelde skadeverket.

Det var den norske avdelinga av gruppa Extinction Rebellion som stod for markeringa. Tidlegare har gruppa planta eit epletre, ei mynteplante og grasløk framfor Stortinget og hatt ei markering der dei la seg ned - ein såkalla die-in - på taket av Operaen i Oslo.

I Storbritannia har Parlamentet som den første nasjonalforsamlinga i verda erklært klimakrise i eit forsøk på å møte kravet frå demonstrantane i Extinction Rebellion i landet.

(©NPK)

Extinction Rebellion Norge demonstrerte utanfor Noregs Bank fredag. Foto: Terje Bendiksby / NTB scanpix

Det vart ein god dialog med demonstrantane, ifølgje politiet. Foto: Terje Bendiksby / NTB scanpix

Demonstrantane på utsida av Noregs Bank limte seg fast i kvarandre. Foto: Terje Bendiksby / NTB scanpix