Hydro kan starte opp full produksjon ved Alunorte-anlegget i Brasil
Lokale miljøstyresmakter i delstaten Pará i Brasil har oppheva produksjonsembargoen ved Hydros aluminaraffineri Alunorte, melder Norsk Hydro i ei børsmelding.
Anlegget har køyrt for halv maskin etter at miljøstyresmaktene (SEMAS) og ein regional domstol påla Norsk Hydro å redusere produksjonen ved det som er det største aluminaraffineriet i verda.
- Avgjerda frå SEMAS er ei viktig vedkjenning av at verksemda ved Alunorte er trygg. Vi fortset dialogen med styresmaktene for å få ei løysing som tillèt full produksjon ved Alunorte, seier konserndirektør John Thuestad i Norsk Hydro i ei børsmelding.
Produksjonen kan likevel ikkje aukast umiddelbart sidan embargoen til domstolen framleis gjeld. Alunorte skal derfor informere om avgjerda til domstolen og håper på ei rask avgjerd.
Sidan mars 2018 har anlegget køyrt med redusert kapasitet etter skuldingar om forureina drikkevatn som følgje av lekkasjar etter ekstrem nedbør. Hydro har sjølv tilbakevist skuldingar om miljøskadelege utslepp.
Halvering av produksjon har gitt selskapet eit inntektstap på fleire milliardar.
Norsk Hydro-aksjen steig på Oslo Børs etter at nyheita vart kjent. Ved 9.30-tida var oppgangen på 4,6 prosent.
(©NPK)
Illustrasjonsfoto: Fredrik Hagen / NTB scanpix