Klimaungdommen i samla flokk - SV krev handling frå Solberg
SV krev konkrete tiltak frå statsministeren, som møtte dei mange klimastreikande ungdommane fredag.
Fredag formiddag samla mange ungdommar seg i Oslo og ei rekke andre byar for å protestere mot klimapolitikken til regjeringa.
- Eg reknar med at statsminister Erna Solberg vil komme klimaungdommen i møte med konkrete tiltak og ikkje tomme ord, seier SV-leiar Audun Lysbakken i forkant av dei mange klimastreikane landet over.
Forventningane er store før talen til statsministeren framfor Stortinget fredag. Der skal ho møte mange av dei klimastreikande ungdommane.
Gaute Eiterjord i Natur og Ungdom håpar statsministeren har meir å komme med enn sist når ho skal møte den yngre generasjonen fredag.
Even Jacobsen (13), som er ein av initiativtakarane til streiken i Noreg, har òg store forventningar til at statsministeren skal levere.
- Eg vil at Solberg skal seie at ho tar framtida vår på alvor og vil innfri krava våre! Det som vil vere mest provoserande, er om ho held fram å rose engasjementet vårt, men ikkje lyttar, seier han til NTB.
Den store testen kjem i juni, når statsminister Erna Solberg og alle partia i regjeringa og opposisjonen skal stemme over forslaga til dei klimastreikande ungdommane om å erklære klimakrisa som ein nasjonal nødsituasjon.
(©NPK)
Barn og unge protesterer mot klimapolitikken. Foto: Ole Berg-Rusten / NTB scanpix
Statsminister Erna Solberg skal tale til klimastreikande unge utanfor Stortinget fredag. Foto: Ole Berg-Rusten / NTB scanpix
Statsminister Erna Solberg skal tale til klimastreikande unge utanfor Stortinget fredag. Foto: Ole Berg-Rusten / NTB scanpix