KrF vil likevel flytte den norske ambassaden til Jerusalem
KrFs programkomité snur i spørsmålet om ambassadeflytting i Israel etter press frå stortingsgruppa og fleire fylkeslag, melder Dagen.
Då KrFs programkomité la fram førsteutkastet sitt til nytt partiprogram i november, var det fleire som merka seg at punktet om å flytte Noregs ambassade i Israel til hovudstaden Jerusalem ikkje var der.
No har programkomiteen snudd i spørsmålet og formuleringa er tilbake, seier komitéleiar Erik Lunde. Det andre programutkastet blir lagt fram seinare i mars.
Bakgrunnen er ifølgje Dagen at fleire fylkeslag, som Agder og Rogaland, har lagt press på programkomiteen. I tillegg har stortingsgruppa levert ei einstemmig innstilling om å ta inn igjen formuleringa slik ho står i dagens program:
«KrF vil flytte den norske ambassaden til Jerusalem så snart dette kan la seg gjøre på en måte som ikke er til hinder for fredsprosessen».
– Vi meiner dette er ei programformulering som beskriv godt konflikten i Midtausten, men som også markerer haldninga vår til Israel, seier KrFs parlamentariske leiar Hans Fredrik Grøvan til Dagen.
Også i 2017 foreslo programkomiteen å fjerne ambassade-punktet frå partiprogrammet. Då enda det med votering på landsmøtet.
Den norske ambassaden i Israel har sidan 1950 lege i Tel Aviv, som er Israels største by. Jerusalem er ikkje internasjonalt anerkjent som hovudstaden i landet, men USA flytta i 2017 ambassaden sin til Jerusalem.
(©NPK)
Parlamentarisk leiar Hans Fredrik Grøvan i KrF vil halde på programformuleringa om at Noreg skal flytte ambassaden sin i Israel frå Tel Aviv til Jerusalem. Foto: Håkon Mosvold Larsen / NTB