Liten nedgang på Oslo Børs
Det vart ein liten nedgang på 0,25 prosent på Oslo Børs tysdag. Hovudindeksen enda på 915,5 poeng. Mest omsett var Equinor.
Energiselskapet gjekk opp 0,4 prosent.
Deretter følgde Norwegian Air Shuttle, som gjekk opp 2,3 prosent. Flyselskapet har vorte hardt ramma av at Boeing 737 MAX-flya vart sette på bakken som følgje av to ulykker. Måndag varsla Boeing at flya kan vere på vengene igjen i januar.
På andreplass kom DNB med ein marginal oppgang på 0,03 prosent.
Deretter følgde sjømatselskapet Mowi med ein nedgang på 0,6 prosent. Tysdag vart Ivan Vindheim (48) utnemnd til ny konsernsjef hos lakseprodusenten. Han tar over for Alf-Helge Aarskog, som har leidd selskapet sidan 2010.
Telenor var òg blant dei mest omsette selskapa med ein oppgang på 0,2 prosent.
Energisektoren gjekk opp 0,2 prosent, medan sjømatsektoren hadde ein nedgang på 1,1 prosent. Shippingsektoren enda med ein oppgang på 0,7 prosent.
Prisen på nordsjøolje gjekk opp 35 cent, og eit fat vart omsett for 62,6 dollar tysdag ettermiddag.
I USA hadde både den tonegivande Standard & Poor-indeksen og teknologindeksen Nasdaq stige med 0,5 prosent ved 17-tida tysdag. Den industritunge indeksen Dow Jones hadde stige 0,3 prosent.
På dei viktigaste europeiske børsane var det oppgang. FTSE 100 i London gjekk opp 0,7 prosent, CAC 40 i Paris gjekk opp 0,5 prosent og DAX 30 i Frankfurt gjekk opp 0,7 prosent.
Nikkei-indeksen i Japan hadde ein oppgang på 0,8 prosent, medan Hang Seng i Hongkong gjekk opp 0,5 prosent tysdag.
(©NPK)
Oslo Børs. Foto: Terje Pedersen / NTB scanpix