Melanie Stokke yppa seg mot tennisstjerna Collins
Melanie Stokke baud på sterk motstand før ho måtte sjå seg slått av toppseeda Danielle Collins i 1. runde i 25.000-dollarturneringa i tennis i Florida.
Collins sigra 6-2, 7-5 i ein kamp som varte ein time og 54 minutt.
Den norske 23-åringen tok seg til hovudturneringa i Naples med tre sigrar i kvalifiseringa. Der møtte ho amerikanske Collins, som tidlegare i år spelte semifinale i Australian Open, men ho gjekk respektlaust til verks og gav storfavoritten problem.
Stokke greidde å bryte serven til Collins i første forsøk og leidde 2-0 i 1. sett, men Collins slo veldig tilbake, braut serven til motstandaren tre gonger og vann settet 6-2 etter 48 minutt.
I 2. sett braut Collins umiddelbart etter å ha lege under 0-40, og ho rakk å vinne det åttande gamet sitt på rad før Stokke endeleg heldt serven igjen og reduserte til 1-2.
Stokke fekk blod på tann og braut Collins' serve for annan gong til 2-2. Stokke braut igjen til leiing 4-3. På 5-4 var ho berre to poeng frå settsiger, men Collins halte i land servegamet og utlikna til 5-5. To dobbeltfeil vart skjebnesvangre for Stokke då Collins deretter braut til 6-5-leiing og serva heim kampen.
25-årige Collins er på 31.-plass på WTA-rankinga. Det er meir enn 400 plassar føre 445.-rangerte Stokke.
(©NPK)