Produksjonen i gang på gassfeltet Aasta Hansteen
Måndag byrjar gass frå Aasta Hansteen- feltet i Norskehavet å strøyme ut på marknaden i Europa.
Equinor opplyser at produksjonen starta søndag.
- I dag, 17. desember, går den første gassen frå Aasta Hansteen til marknaden, og saman med røyrleidninga Polarled opnar feltet ein ny region for gasseksport til Europa, opplyser selskapet.
Feltet ligg 300 kilometer vest for Sandnessjøen, langt frå andre felt og i eit område med røffe vêrforhold.
- Produksjonen frå Aasta Hansteen- feltet vil bidra til å sikre langsiktig norsk gasseksport. Med infrastruktur på plass blir det òg meir attraktivt å leite rundt plattforma og langs røyrleidninga, seier konserndirektør for utvikling og produksjon i Noreg Arne Sigve Nylund i Equinor.
Forventa utvinnbare ressursar frå Aasta Hansteen er 55,6 milliardar standard kubikkmeter gass og 0,6 millionar standard kubikkmeter kondensat. Dette svarar til 353 millionar fat oljeekvivalentar.
Equinor er operatør på feltet, mens Wintershall, OMV og ConocoPhillips er partnarar.
Feltet er kalla opp etter kvinnesaksforkjempar, samfunnsdebattant, målar og forfattar Aasta Hansteen (1824-1908).
(©NPK)
Aasta Hansteen-plattforma fotografert under ferdigstilling i Digernessundet ved Stord i mars. Plattforma blei taua ut i Norskehavet i april - det største slepet på norsk sokkel sidan Troll A i 1995. Foto: Marit Hommedal / NTB scanpix