Sea Watch-kaptein har forlate Italia
Sea-Watch-kapteinen Carola Rackete, som vart arrestert i Italia etter å ha tatt med seg migrantar til land utan løyve, har sett kursen mot Tyskland.
Rackete vart arrestert og sett i husarrest i slutten av juni etter at ho trassa italienske styresmakter ved å gå til kai på øya Lampedusa med redningsskipet, som hadde 42 migrantar om bord.
Sea-Watch stadfestar fredag at 31-åringen er på veg til Tyskland. Rackete vart lauslaten i byrjinga av juli, men måtte forklare seg i retten i Italia. Ho kom torsdag til retten i Agrigento på Sicilia, der det var venta at ho mellom anna måtte svare på kvifor ho redda migrantane utan å vente på den libyske kystvakta.
Italias innanriksminister Matteo Salvini gav i juni ein ordre som inneber at eigarar og operatørar kan få skyhøge bøter viss redningsbåtar entrar italiensk farvatn utan løyve.
Rackete risikerer ei italiensk etterforsking knytt til skuldingar om å yte bistand og medverke til ulovleg innvandring og for å ha trassa ordren til italienske styresmakter.
(©NPK)
Sea-Watch-kapteinen Carola Rackete, som vart arrestert i Italia etter å ha tatt med seg migrantar til land utan løyve, har sett kursen mot Tyskland. Her er ho på veg inn i ein politibil da ho kom til Sicilia i byrjinga av juli. Foto: Ap / NTB scanpix