Arafats nobelpris på museum
(NPK-NTB-AP): Nobelprisen til Yasser Arafat skal stillast ut i eit nytt museum for den palestinske leiaren på Vestbreidda.
Det er klart etter at den islamistiske Hamas-rørsla har gjeve nobelmedaljen til Arafat tilbake til Den palestinske sjølvstyremakta.
Medaljen vil bli stilt ut i det nye museet i Ramallah når det opnar 9. november, opplyser Nasser al-Qidwa, nevøen til Arafat og leiar for Arafat-instituttet.
Yasser Arafat fekk Nobels fredspris saman med dåverande statsminister i Israel, Yitzhak Rabin, og utanriksminister Shimon Peres i 1994. Bakgrunnen for prisen var forsøket deira på å oppnå fred mellom Israel og palestinarane.
Då Hamas tok makta på Gazastripa i 2007, blei det tidlegare hovudkvarteret til Arafat i Gaza by plyndra. Ein av gjenstandane som forsvann, var novelmedaljen til den døde PLO-leiaren. (©NPK)