Drapssikta 17-åring erkjenner straffskuld
17-åringen som har innrømt å ha drepe Sunniva Ødegård på Varhaug i Rogaland, samtykkjer til ytterlegare to veker i varetekt.
Den sikta guten vil bli kravd fengsla tysdag, og fordi han har samtykt, vil rettsmøtet i Bergen tingrett gå som såkalla kontorforretning, opplyser Sørvest politidistrikt i ei pressemelding måndag. 17-åringen blir ikkje pålagt restriksjonar i den forlengde fengslingsperioden. Han sit varetektsfengsla på ungdomseininga ved Bjørgvin fengsle utanfor Bergen.
Tenåringen erkjenner straffskyld for drapet, fortel TV 2. Eit motiv bak handlinga er førebels ukjent.
- Det har vore tema i avhøyr, men vi kjem ikkje til å gå inn på det no, seier etterforskningsleiar Bjørn Kåre Dahl til kanalen.
Det er framleis mykje etterforskingsarbeid som står att, men det vil ikkje bli sett i verk nye avhøyr av sikta dei nærmaste dagane.
- Vi arbeider no mellom anna med å sjekka forklaringa til den sikta opp mot andre spor i saka, opplyser Bjørn Kåre Dahl, som leier personseksjonen i politidistriktet. Han seier politiet også ventar på svar på tekniske analysar.
- Dette er ei omfattande sak der politiet sit på store mengder informasjon. Vi arbeider med å få kasta lys over saka best mogleg, og dette er tidkrevjande arbeid.
(©NPK)
Den drapssikta 17-åringen samtykkjer til to nye veker i varetekt. Det er ikkje planlagt nye avhøyr med han dei nærmaste dagane. Foto: Carina Johansen / NTB scanpix