Frankrike stenger investeringskontor i Moskva
Den franske regjering har avgjort å stengje eit statleg kontor i Moskva som arbeider for auka investeringar i Frankrike.
I ei kunngjering frå den franske ambassaden i Moskva heiter at avgjerda om å stengje Business France-kontoret kjem av at moglegheitene for å drive vidare er blitt sterkt svekte dei siste månadene.
Ambassaden viste til utvisinga av leiaren for kontoret frå Russland og beslaglegginga av bankkontoen til kontoret. Direktøren ved kontoret var ein av fire diplomatar som blei utviste i mars.
Dette var ein gjengjeldingsaksjon etter at vestlege land utviste russiske diplomatar i kjølvatnet av saka med forgifting i Salisbury i England.
Trass i at Business France stenger aukar handelen mellom Russland og Frankrike. President Emmanuel Macron besøkte Moskva søndag i samband med finalen i fotball-VM, og under eit møte med president Vladimir Putin blei det opplyst at samhandelen auka med 19 prosent i første halvdel av 2018.
(©NPK)
Frankrike stengjer investeringskontoret sitt i Moskva, men handelen mellom Russland og Frankrike aukar. Dette opplyste dei to presidentane under eit møte før finalen søndag. Foto: Martin Meissner/AP/NTB scanpix