Gjekstad presentert som ny Vipers-trenar
Ole Gustav Gjekstad blir hovudtrenar for Vipers Kristiansand frå neste sesong. Han har skrive under ein treårskontrakt med den ambisjonsrike handballklubben.
Vestfoldingen vart presentert på ein pressekonferanse torsdag.
Måndag vart det klart at Kenneth Gabrielsen gir seg som Vipers-trenar etter sesongen. Laget kjempar om seriegullet i eliteserien for kvinner. Sørlendingane har alt i eigne hender i sesonginnspurten.
Frå neste sesong er det Gjekstad som skal leie kvinnelaget frå Kristiansand. 50-åringen har store ambisjonar.
- Vi er framleis der i Noreg at vi ikkje har nokon som er blant dei tolv beste i Europa, og det er litt rart når vi har det beste landslaget i verda. Så målet må bli å få lag som kan hevde seg i toppen igjen, sa Gjekstad på pressekonferansen, ifølgje Fædrelandsvennen.
Gjekstad er eit kjent namn i handballverda. Han trente Larvik i to periodar frå 1998 til 2005 og frå 2011 til 2015. Han var også trenar for herrelaget til Drammen mellom 2005 og 2008.
Med begge klubbane vann han både serien, cupen og sluttspelet. I Larvik førte han laget også til siger i meisterligaen.
(©NPK)
Ole Gustav Gjekstad tar til sommaren over som ny Vipers-trenar. Her er han frå tida i Larvik. Foto: Aleksandar Djorovic / NTB scanpix