Razzia hos fransk meierigigant
Fransk politi har gjennomført ein razzia hos meierigiganten Lactalis, som blir skulda for å ha selt morsmjølkerstatning med salmonellasmitte.
Hovudkvarteret til selskapet, i Laval vest i Frankrike, blei gjennomgått av politiet onsdag.
Også ein fabrikk i Craon blei undersøkt, ifølgje ei kjelde med kjennskap til saka. 70 politifolk deltok visstnok i operasjonen.
Lactalis oppdaga salmonellabakteriar på fabrikken i fjor, men funnet blei ikkje offentleggjort. Dette er blitt grunngitt med at bakteriane ikkje blei oppdaga i sjølve produkta.
Seinare er selskapet blitt nøydd til å trekke tilbake pakkar med morsmjølkerstatning i 83 land. Minst 37 spedbarn er blitt smitta av salmonella i Frankrike, mens eitt tilfelle er stadfesta i Spania. Eitt mogleg salmonellatilfelle blir etterforska i Hellas.
Fleire hundre familiar har saksøkt Lactalis, som har lovd å gi erstatning til familiane som er berørt.
(©NPK)
Illustrasjonsfoto: AP/NTB scanpix