Straumleverandørar skal informere forbrukarane betre
(NPK-NTB): Nye vilkår i straumavtalane skal gjere det enklare for kundane å halde seg informerte om pris og andre endringar frå kraftleverandørane.
Vilkåra blir innført etter ein avtale mellom Energi Norge og Forbrukarombodet.
Alle straumkundar vil bli varsla direkte på SMS eller e-post dersom straumprisen blir endra eller om leverandøren gjer andre endringar i straumavtalen. Det skal også gjerast klarare for forbrukarane korleis selskapa reknar ut kostnadene ved fastprisavtalar. Endringa skal også forhindre at kundar med avtalar som går ut etter ei viss tid, risikerer å bli overførte til dyr «ventestraum».
– Vi håpar dette kan styrke straummarknaden og bidra til å hindre tvistar mellom forbrukarar og straumleverandørar i framtida, seier juridisk direktør i Forbrukarombodet Frode Elton Haug.
Dei nye standardvilkåra skal takast i bruk innan 1. januar 2017. (©NPK)