To menn arresterte for drap på Hellerud
To menn er arresterte i utlandet og sikta for drap eller medverknad til drap på ein 54 år gammal mann på Hellerud i Oslo 15. juni i år.
- Vi har arrestert to menn i utlandet og sikta dei for drap eller medverknad til drap, seier politiinspektør Grete Lien Metlid.
Metlid opplyser at dei to mennene ikkje er norske og blei arrestert i to ulike europeiske land.
54-åringen blei funnen drepen i rekkehusleilegheita sin på Hellerud i Oslo torsdag 15. juni. Det var nære familiemedlemmer som fann han. Den første blei arrestert i helga og andremann måndag, opplyser politiet.
- Dette er eit resultat av internasjonalt samarbeid med politistyresmakter i ei rad europeiske land. Dei blei arresterte av lokalt politi og er sikta for drapet i Noreg, seier Metlid.
Vidare opplyser ho at dei pårørande i saka er varsla om utviklinga og at prosessen med å få dei to sikta i saka utlevert er sett i gang.
- Vi satsar på å få dei hit, seier Metlid.
Politiet opplyser om at dei på noverande tidspunkt ikkje vil gå ut med meir informasjon av polititaktiske grunnar.
- Vi har meir informasjon som vi jobbar med. Men det er for tidleg å seie noko meir om til dømes kva som har leidd til siktinga eller motiv, seier Metlid.
Den drepne mannen var norsk statsborgar med tyrkisk bakgrunn.
(©NPK)
Leilegheita på Hellerud der ein 54 år gammal mann blei funnet drepen.
Foto: Tore Meek / NTB scanpix