10.300 utlendingar vart norske statsborgarar i fjor
I fjor fekk 10.300 utlendingar norsk statsborgarskap. Det er under halvparten så mange som året før då det vart innvilga 21.600 statsborgarskap.
17 prosent av dei nye statsborgarane i 2018 kjem frå land i Europa, medan 72 prosent kjem frå asiatiske og afrikanske land, viser nye tal frå Statistisk sentralbyrå (SSB).
Dei siste ti åra har til saman 136.600 utlendingar vorte norske statsborgarar, så fjorårstala ligg noko under snittet.
Somaliarar utgjorde med omtrent 1.900 nye statsborgarskap den største gruppa som vart norske borgarar i 2018. Deretter følgde eritrearar med omtrent 1.100 og irakarar med 600 tildelingar.
Ein av tre under 18 år
I 2017 var 56 prosent av dei nye statsborgarane kvinner, medan tilsvarande tal i 2018 var 51 prosent. Dei siste 20 åra har nokre fleire kvinner enn menn fått norsk statsborgarskap.
Fordelinga på kjønn varierer mykje mellom dei opphavlege statsborgarskapa. Det var meir enn tre gonger fleire kvinner enn menn blant tidlegare statsborgarar frå Brasil, Ukraina og Thailand. På den andre sida var Sudan og Afghanistan to av dei gruppene med lågast del kvinner som fekk norsk statsborgarskap.
Rundt ein tredel av dei nye norske statsborgarane er under 18 år. I denne aldersgruppa utgjer somaliarar 47 prosent av dei som blir norske borgarar, medan pakistanarar utgjer 18 prosent.
100 land
Dei nye norske statsborgarane kjem frå rundt hundre ulike land. Nesten ni av ti søkarar fekk innvilga søknaden, ifølgje Utlendingsdirektoratet. Som hovudregel må ein ha hatt sju års lovleg opphald i Noreg før ein kan søke om norsk statsborgarskap.
I tillegg til dei som fekk norsk statsborgarskap, fekk 14.500 personar permanent opphaldsløyve. Her toppar syriske borgarar lista med vel 3.000 opphaldsløyve. Eritrearar er på andreplass med 2.400, følgt av somaliarar med 1.400 og filippinarar og afghanarar med vel 800 opphaldsløyve kvar.
For å få permanent opphaldsløyve må ein ha hatt lovleg opphald i Noreg i minst tre år, ein må kunne forsørgje seg sjølv, og ein kan ikkje vere straffedømt.
(©NPK)
Statsminister Erna Solberg (H) på statsborgarseremoni i Oslo rådhus hausten 2019, saman med fylkesmann Valgerd Svarstad Haugland, Oslos ordførar Marianne Borgen (SV) og ordførarar frå kommunar som får nye statsborgarar. Foto: Vidar Ruud / NTB scanpix