100 kyllingbønder ønskjer sluttpakke

– Vi er no i dialog med kvar og éin og vurderer kven vi inngår avtale med. Det er stor interesse for å ta imot omstillingsavtale. I han ligg det ein kompensasjon ut frå kor mange dyr produsenten har, og moglegheit til å få økonomisk støtte og rådgjeving til omlegging, seier informasjonssjef Ellen Flø Skagen i Nortura til Bergens Tidende.

I dag er det totalt 350 kyllingprodusentar i Noreg, skriv avisa. Alle ti i Hordaland har fått tilbod om omstillingsavtale. Éin av dei er Erik Kvinge, som etter å ha investert 4 millionar kroner i kyllingfjøset, no blir tilbydd 200.000 kroner over ein toårsperiode, pluss 70.000 kroner som støtte til utdanning eller omskolering.

– Tilbodet frå Nortura er i realiteten ei tvungen sluttpakke. Enten godtar vi ho, eller så vil vi sannsynlegvis bli sagt opp som produsent. Vi får ikkje levere kylling. Dette er trasig, seier Kvinge.

Målet til Nortura er å konsentrere produksjonen rundt dei tre store slakteria sine i Elverum i Hedmark, Hærland i Østfold og Hå i Rogaland. Leiar i Hordaland Bondelag Frøydis Haugen har stor forståing for frustrasjonen blant mange bønder, men synest det er bra at Nortura tilbyr ei snillare løysing enn berre å seie opp kontrakten.

– Pakkene skal gi ei moglegheit til omstilling. Slik sett tar Nortura eit viktig ansvar for produsenten, seier Haugen. (©NPK)