18-åring tiltalt for drap på jente (13) på Varhaug i Rogaland i juli i fjor
Ein 18 år gammal mann, som er tiltalt for å ha drepe 13 år gamle Sunniva Ødegård på Varhaug i Rogaland 29. juli i fjor, risikerer forvaring.
Tiltaleavgjerda omfattar drap, likskjending, falsk skulding og skadeverk.
- Den tiltalte 18-åringen har i avhøyr erkjent straffskyld for drap, seier statsadvokat Nina Grande.
Tiltalen er tatt ut etter ordre frå Riksadvokaten. Den 13 år gamle jenta vart drepen på Varhaug klokka 22.45 den 29. juli 2018. Ifølgje tiltalen vart 13-åringen slått i hel med ein hammar og døydde av hjerneblødingar.
Saka vil starte opp onsdag 15. mai i Jæren tingrett. Det er sett av vel fire veker til saka.
Sunniva Ødegård vart funnen drepen på ein sti ved jernbanelinja på Varhaug i Hå kommune på Jæren natt til måndag 30. juli i fjor. Under eit tidleg avhøyr tilstod 18-åringen som er sikta for drapet å ha tatt livet av 13-åringen.
Mannen har òg erkjent straffskyld og forklart at Sunniva var eit tilfeldig offer.
Sakkunnige har vurdert den sikta 18-åringen og har konkludert med at han verken var psykotisk eller hadde sterkt nedsett medvit då drapet skjedde.
I tiltalen blir tatt det tatt atterhald om at det kan bli lagt ned påstand om forvaring for den tiltalte mannen.
Politiet på funnstaden på Varhaug i samband med drapet på Sunniva Ødegård. Foto: Carina Johansen / NTB scanpix