2.970 nye koronasmitta registrert siste døgn

Dei siste sju dagane er det i snitt registrert 2.375 koronasmitta per dag. Tilsvarande snitt for sju dagar sidan låg på 1.919, så trenden er stigande.

Tala for onsdag viste heile 4.575 registrerte koronasmitta i Noreg. Det er det klart høgaste talet så langt, men forklaringa ligg truleg i låg registrering dagen før. Den førre toppnoteringa var 16. november og var på 2.552 koronasmitta.

Torsdag var 227 koronapasientar innlagde på sjukehus. Det var fem færre enn dagen før.

I alt 62 av pasientane ligg på intensivavdeling, og blant dei er 34 på respirator. Det er tre fleire på intensiv og éin færre på respirator samanlikna med dagen før, ifølgje Helsedirektoratets oversikt.

Ved midnatt natt til fredag var det utført 8,4 millionar koronatestar her i landet sidan februar i fjor. I alt har 254.367 personar testa positivt.

Til no har 4.232.581 personar fått første dose av koronavaksinen, 3.806.238 personar har fått andre og 436.952 har fått tredje dose.

Til saman er 1.050 koronasmitta personar døde i Noreg sidan mars 2020, viser førebelse tal. Om pasientane har døydd av eller med covid-19, er ikkje alltid mogleg å slå fast.

59,3 prosent av alle døde har fylt 80 år. I aldersgruppa under 50 år er det meldt om 23 dødsfall i Noreg.

(©NPK)