30 nye tips i Trude Espås-saka

8. august var det 20 år sidan kvinna frå Orkanger blei valdteken og drepen i utkanten av turistbygda Geiranger på Sunnmøre.

Etter at politiet den siste tida har etterlyst nye tips, har det kome over 30 meldingar, opplyser påtaleansvarleg Yngve Skovly i Møre og Romsdal politidistrikt til NRK.

Skovly kallar ingen av tipsa «revolusjonerande», men at det blant anna har kome informasjon om namngitte personar politiet bør snakke med.

– Nokre av tipsa har vi også fått tidlegare, og dei er undersøkte. Andre ser vi at det ikkje er grunn til å forfølgje. Men vi har også fått inn enkelte tips som nok vil føre til litt innsats frå vår side, seier han.

Drapet på Trude Espås i Geiranger har aldri vore lagt vekk frå politiet si side. Digitaliseringa av heile det omfattande etterforskingsmaterialet gjer det mogleg for Kripos å kunne etterforske saka med den nye eininga for alvorlege uoppklara saker, den såkalla cold case-eininga.

Kripos vil no vurdere saka så raskt som mogleg og gi beskjed til Møre og Romsdal politidistrikt om dei kjem til å gå gjennom saka på nytt. (©NPK)