70 millionar til miljøvennlege skip

(NPK-NTB): Regjeringa vil gi ytterlegare 70 millionar kroner til utvikling av klimavenlege skip gjennom ei ny støtteordning.

npk@npk.no

Publisert: 26.05.2016 kl 16:34

– Gjennom denne ordninga vil vi bidra til at verksemdene får meir miljøvennleg teknologi ut på marknaden, og at dei skapar fleire grøne arbeidsplassar, seier næringsminister Monica Mæland (H) i ei fråsegn torsdag.

Forskingsrådet, Innovasjon Noreg og Enova lanserer støtteordninga Pilot-E. Den første utlysinga på 70 millionar kroner skal gå til aktørar som ønskjer å utvikle nye løysingar for utsleppsfri maritim transport.

Tidlegare denne månaden opplyste regjeringa at ho foreslår 65 millionar kroner til elektriske ferjer og annan miljøvennleg skipsfart i revidert nasjonalbudsjett. Desse pengane kjem i tillegg til støtta gjennom Pilot-E. (©NPK)