Advokatar og menneskerettsforkjemparar tildelt alternativ nobelpris

Vinnarane av det som ofte blir omtala som den alternative fredsprisen, blei kunngjort i Stockholm måndag.

Advokatane Thelma Aldana frå Guatemala og Ivan Velasquez frå Colombia får prisen for sitt arbeid mot korrupsjon i Guatemala.

Ifølgje juryen har dei to drive «innovativt arbeid for å avdekkje misbruk av makt og korrupsjon». Det var avsløringane deira av kriminelle nettverk med band til regjeringa som førte til tidlegare president Otto Perez Molinas avgang.

Aldana har leidd påtalemakta i Guatemala sidan 2014, og Velasquez har sidan 2013 vore leiar for den FN-støtta Internasjonale kommisjonen mot straffefridom i Guatemala (CICIG).

Blant andre prisvinnarar i år er tre fengsla menneskeretts- og demokratiforkjemparane frå Saudi-Arabia. Dei tre, som heiter Abdullah al-Hamid, Mohammad Fahad al-Qahtani og Waleed Abu al-Khai, har med fredelege verkemiddel arbeidd for menneskerettar, konstitusjonelt monarki og likestilling i diktaturet Saudi-Arabia, opplyser juryen.

Trioen er dei første frå Saudi-Arabia som vinn prisen.

Dei to andre vinnarane er jordbrukaren Yacouba Sawadogo frå Burkina Faso og den australske agronomen Tony Rinaudo.

Sawadogo får prisen for sitt arbeid innan skogplanting, der han ved bruk av tradisjonelle metodar har «gjort ufruktbar jord om til skog og mark og vist korleis jordbrukarar kan gjenopplive jorda si ved bruk av innovativ og tradisjonell lokal kunnskap».

Rinaudo har utvikla ein metode for å vekke røter i uttørka jord til liv og i stand til å produsere spirande tre. Metoden har gjort 50.000 kvadratkilometer med jord fruktbar i Niger.

Prisane blir delt ut i Stockholm 23. november.

(©NPK)

Styreleiar Amelie von Zweigbergk og Ole von Uexkull under utdelinga av Right Livelihood award i år.
Foto: Meli Petersson Ellafi / TT / NTB scanpix