AfD nest størst på tysk meiningsmåling

Ytre høgrepartiet Alternativ für Deutschland (AfD) går fram, mens statsminister Angela Merkels regjeringskoalisjon går like mykje tilbake.

Merkels kristenkonservative parti CDU og søsterpartiet CSU går tilbake med 1 prosentpoeng og fell ned til 28 prosent på ei meiningsmåling publisert fredag av den tyske kringkastaren ARD.

Med dei er framleis den største blokka i landet, men med den lågaste oppslutninga sidan ARDs målingar begynte i 1997. Under fjorårets val fekk CDU/CSU 32,9 prosent av stemmene.

Også det tredje regjeringspartiet, sosialdemokratiske SPD, går tilbake med 1 prosentpoeng og landar på 17 prosent. Partiet fekk 20,5 prosent av stemmene under valet i september i fjor.

Med det har regjeringskoalisjonen ein samla oppslutning på 45 prosent blant tyske veljarar, og ville mista fleirtalet i nasjonalforsamlinga dersom målinga blei ein realitet.

På same måling hopper AfD fram med 2 prosentpoeng, noko som ville gjort det innvandringskritiske partiet til det nest største i den tyske nasjonalforsamlinga med ei oppslutning på 18 prosent. Det er kraftig opp frå valresultatet i september i fjor på 12,6 prosent.

Dei Grøne går også opp frå valresultatet på 8,9 prosent, og ligg på 15 prosent på ARD-målinga.

Dei liberale Fridemokratene (FDP) får 9,2 prosent, og venstrepartiet Linke får 10 prosent på målinga, som er basert på intervju med 1.035 tyske veljarar mellom 17. og 19. september.

(©NPK)

Tysklands statsminister Angela Merkels regjeringskoalisjon taper terreng overfor ytre høyre-partiet AfD på ei ny tysk meiningsmåling. Foto: AP / NTB scanpix.