Afghanske Taliban har utpeikt ny leiar

(NPK-NTB-AFP): Taliban i Afghanistan har utpeikt mulla Haibatullah Akhundzada til ny leiar og bekreftar samtidig at den førre leiaren, mulla Akhtar Mansour, vart drepen i eit amerikansk droneangrep i førre veke.

npk@npk.no

Publisert: 25.05.2016 kl 07:15

Akhundzada har fram til Mansours død vore ein av to nestleiarar i Taliban. Han vart valt til leiar på eit møte mellom ei rad Taliban-leiarar, ifølgje ei kunngjering som vart sendt til ulike medium onsdag. Det blir rekna med at møtet vart halde i Pakistan.

Mansour vart drepen i Pakistan laurdag då køyretøyet hans vart treft av ei amerikansk drone. Det skal vere første gong ein Taliban-leiar blir drepen på denne måten på pakistansk territorium.

Taliban hadde makta i Afghanistan før regimet vart styrta med amerikansk militærhjelp i 2001. Det har sidan kjempa mot den USA-støtta regjeringa. (©NPK)