Aktor hevdar Trump prøvde å fordreie presidentvalet i 2016

Ein jury på tolv personar skal avgjere om den tidlegare presidenten gjorde seg skuldig i lovbrot då han etter seiande betalte seg ut av pinlege avisoppslag og deretter forfalska interne rekneskapar for å dekkje over utlegga.

Som vanleg fyrte Trump av nokre salvar mot det han kalla heksejakta til styresmaktene, der målet etter seiande er å forstyrre presidentvalkampen og minske Trumps sjansar til ein ny periode i Det kvite hus.

– Dette er ein svært, svært trist dag for Amerika, sa den 77 år gamle kandidaten idet han gjekk inn i rettsbygningen på Manhattan.

– Eg er her i staden for å vere i Pennsylvania, i Georgia og ei rekke andre stader for å drive valkamp. Dette er ei heksejakt, og det er skammeleg, sa Trump.

Historisk rettssak

Donald Trump er den første tidlegare presidenten i USA-amerikansk historie som er tiltalt i ei straffesak. Tiltalen gjeld brot på rekneskapslova i samband med ei utbetaling på 130.000 dollar, godt og vel 1,4 millionar kroner, til Stephanie Clifford, betre kjent som pornoskodespelaren Stormy Daniels.

Dei såkalla hysjpengane vart utbetalte via advokaten til Trump, Michael Cohen, rett før presidentvalet i 2016, truleg for at Clifford skulle halde tett om at ho og Trump hadde hatt sex på eit hotell ti år tidlegare.

Fengsel lite sannsynleg

Hysjpengesaka blir rekna for å vere den minst skadelege av dei fire sakene Trump for tida er involvert i. To andre saker er av meir politisk natur og knyter seg til storminga av Capitol i januar 2020. Ei siste sak gjeld oppbevaring av hemmelege dokument etter at Trump gjekk av som president.

Dersom han blir funnen skuldig etter tiltalen i hysjpengesaka, risikerer Trump fengsel, men juridiske ekspertar meiner at bøtelegging er meir sannsynleg.

(©NPK)

Tidlegare president Donald Trump møtte måndag i retten i New York for å høyre opningsinnlegget til aktoren i den såkalla hysjpengesaka. Foto: Angela Weiss / AP / NTB