Aktor krev 7,5 års fengsel for dødsvald

Statsadvokat Tormod Haugnes har lagt ned påstand om sju og eit halvt års fengsel for 42-åringen som er tiltalt for å ha slått ned 50 år gamle Torbjørn Bauge, skriv Bergens Tidende.

42-åringen svarte nei på skuldspørsmålet då rettssaka starta måndag. Ifølgje Haugnes er det mykje som skurrar i forklaringa til 42-åringen.

– Nærmare forsettleg drap enn dette, er det vanskeleg å kome, sa aktor i retten, ifølgje NRK.

Bakgrunnen for tiltalen er eit slagsmål utanfor Sagvåg på Stord i desember 2014.

Ifølgje tiltalen skal 42-åringen ha slått Bauge gjentekne gonger med eit stolbein eller ein annan gjenstand i hovudet og kroppen og kanskje også ha sparka han.

Som følgje av valden fekk Bauge knusingsskadar i ansiktet og hovudet, brystet og buken. Skadane gav blødingar som førte til at han døydde seinare same dag.

42-åringen har i avhøyr forklart at han forsvarte kona si mot vald frå 50-åringen. (©NPK)