Alle CHC-helikopter på bakken etter leiaravgang

Dagleg leiar Per Andre Rykhus trekte seg ifølgje Stavanger Aftenblad måndag brått frå jobben han har hatt sidan desember 2017.

Ifølgje Luftfartstilsynet må dei ha ein ansvarleg leiar å ta omsyn til for å kunne godkjenne at CHC Helikopter Service flyg. No som selskapet ikkje har ein dagleg leiar, får ikkje CHC transportert oljearbeidarar til og frå jobb.

Ifølgje NRK har Luftfartstilsynet trekt godkjenninga til over 40 avgangar. Pressekontakt i CHC Vegard Einan understrekar at redningshelikoptera selskapet opererer, ikkje er ramma.

Einan håpar å få flygingane i gang i dag.

– Vi er i ein tett dialog med Luftfartstilsynet for å sørgje for at dei får den dokumentasjonen dei treng, seier Einan.

Dag Johan Sætre er utnemnd som ny dagleg leiar. Sætre seier til Aftenbladet at ein ny søknad om å ta opp att operasjonane er sendt inn til Luftfartstilsynet.

– Men eg tør ikkje seie kor lang tid det kan ta, seier Sætre

(©NPK)

Lokala til CHC helikopterservice på Flesland.
Foto: Emil Breistein / NTB / NPK