– Minst 70 drepne i kampar nord for Aleppo

Syrian Observatory for Human Rights opplyser torsdag ettermiddag at 70 soldatar og 39 opprørskrigarar er drepne i kampane rundt Al-Maleh nord for byen Aleppo.

I tillegg er eit ukjent tal jihadistiske opprørarar frå Jabhat al-Nusra drepne, ifølgje SOHR.

Bashar al-Assads regime har prøvd å ta tilbake kontrollen over Al-Maleh i over to år. Dei siste månadane har regjeringsstyrkane prøvd å kringsetje Aleppo ved å kutte den viktige forsyningslinja mellom Tyrkia og dei opprørskontrollerte områda i storbyen.

Offensiven mot Al-Maleh er eit ledd i det, men trass i solid russisk luftstøtte har ikkje Assad-styrkane lykkast med å ta tilbake området.

Brorparten av provinsen Aleppo blir framleis kontrollert av islamistiske opprørarar. Storbyen med same namn har sidan juli 2012 vore delt mellom ulike opprørsgrupper og regimet. (©NPK)