Antatt Tel Aviv-angripar skoten og drepen av israelske styrkar

Ein angripar opna torsdag kveld eld mot gjester på ein pub i Dizengoff-gata i Tel Aviv sentrum. I Israel startar helga torsdag kveld, og området var fullt av folk då skytinga starta.

Videoar i sosiale medium viser fleire titals livredde menneske som sprang vekk frå staden, medan politiet bad folk komme seg innandørs medan dei leita etter gjerningspersonen.

Tidleg fredag morgon stadfesta israelske styresmakter at den antekne gjerningsmannen, ein 28 år gammal palestinar frå Vestbreidda, vart skoten og drepne i skotveksling med tryggingsstyrkar i ein moské i Jaffa.

Fleire såra

14 personar er innlagde på sjukehus etter angrepet torsdag, og fire er alvorleg skadde, ifølgje helsestyresmaktene.

Både Hamas, som har makta på Gazastripa, og gruppa Islamsk heilag krig (jihad) hyllar angrepet. Motivet for skytinga er førebels ikkje kjent. Hendinga skjer etter ei tid med auka uro med angrep både frå palestinsk og israelsk side.

USAs utanriksminister Antony Blinken fordømmer det han kallar eit terrorangrep og sender kondolansane sine til dei pårørande.

Valdsbølgje

Israel sette nyleg inn soldatar for å hjelpe politiet med å handtere ei valdsbølgje som kravde elleve menneskeliv på éi veke, like før den islamske fastemånaden ramadan starta.

29. mars vart fem personar skotne og drepne då ein væpna mann på motorsykkel opna eld i Bnei Brak i utkanten Tel Aviv.

I fjor var demonstrasjonar og samanstøytar under ramadan bakteppet for den elleve dagar lange Gaza-krigen.

(©NPK)

Skytinga skjedde mot ein pub i sentrum av Tel Aviv torsdag kveld. Foto: Ariel Schalit / AP / NTB

Tryggingsstyrkar var torsdag kveld i gang med leitinga etter den antekne gjerningsmannen i Tel Aviv. Foto: Ariel Schalit / AP / NTB