Artistsymjar svima av – redda ut av bassenget av trenaren

Alvarez vart redda av trenaren Andrea Fuentes, som stupte uti då ho såg Alvarez liggje på botnen av bassenget. Fuentes fekk amerikanaren til overflata og opp av bassenget.

– Det var skremmande, eg såg at ho ikkje pusta, sa Fuentes til den spanske avisa Marca.

Ifølgje trenaren, som sjølv har fire OL-medaljar, var det ingen av vaktene i symjehallen som reagerte då Alvarez fekk problem.

Alvarez fekk legehjelp i symjehallen og skal vere i god form.

– Ho hadde berre fått vatn i lungene og er ok no, sa trenar Fuentes.

Legen til laget Alyssa Jacobs opplyser at det vil bli teke ei avgjerd fredag om ho skal delta i resten av konkurransen i Budapest.

Ifølgje Jacobs har Alvarez svima av også tidlegare i karrieren.

– Det skjedde ein gong i fjor under kvalifiseringa til OL. Før det har ho hatt sporadiske problem med å svime av, men aldri under konkurranse, seier Jacobs.

Alvarez har delteke i artistisk symjing under symje-VM, som går føre seg i Ungarns hovudstad Budapest.

(©NPK)

Anita Alvarez måtte hentast ut av bassenget under solokonkurransen i VM i svømming i Budapest onsdag. Foto: AP Photo / Anna Szilágyi.