Aserbajdsjan: Armenia har gått med på å gi tilbake fire landsbyar
Det aserbajdsjanske utanriksdepartementet seier Armenia har gått med på å gi frå seg fire landsbyar som har vore under armensk kontroll sidan 90-talet.
Det uttaler ein talsperson for utanriksdepartementet i ei melding på X/Twitter. Hendinga blir beskriven som ei «lenge etterlengta, historisk hending».
Det armenske utanriksdepartementet stadfestar at dei to landa har komme fram til ei førebels semje om fire seksjonar langs grensa.
Armenias statsminister Nikol Pasjinjan uttalte ifølgje Al Jazeera i mars at landet kunne stå overfor ein ny krig med nabolandet Aserbajdsjan viss ikkje dei gjekk med på eit kompromiss og gav tilbake dei fire landsbyane.
Armenia tok kontroll over dei tidleg på 1990-talet. Sidan den gong har dei vore aude. Dei har likevel strategisk verdi sidan dei ligg langs hovudvegen mellom hovudstaden Jerevan og grensa til Georgia.
Aserbajdsjan har sagt at tilbakeføring av område som også omfattar fleire små enklavar som er fullstendig omringa av armensk territorium, er ein nødvendig føresetnad for ein fredsavtale som kan gjere slutt på den tre tiår lange konflikten der også Nagorno-Karabakh-regionen har stått sentralt.
(©NPK)