Auke i narkotikautløyste dødsfall

– Politiet og tollstellet sitt beslag av heroin i 2013 og 2014 viser at styrkegraden til stoffet har auka. Då er det ein større risiko å ta stoffet. Det ser ut til at dødsfalla følgjer styrkegraden, seier forskar Ellen Amundsen ved Folkehelseinstituttet til NTB.

Måndag publiserte Folkehelseinstituttet tala over dødsfall som er utløyste av rus for 2014.

– Det ser ut til at talet på sprøytebrukarar går nedover. Det har vore mykje merksemd rundt narkotikadødsfall dei siste åra. Det begynner å bli ein større innsats i kommunane for å hindre slike dødsfall, forklarer Amundsen.

Av dei 266 narkotikautløyste dødsfalla i 2014, kom 218 som følgje av overdosar. Flest døydde av heroin (34 prosent).

Av dei totale narkotikautløste dødsfalla i 2014 var 33 sjølvmord og 15 dødsfall grunna misbruk. Nest etter heroin døydde 25 prosent av morfin, kodein og andre halv-syntetiske opiat. 16 prosent døydde av metadon, og 12 prosent av syntetiske opioid som Subutex og petidin.

– Det er svært mange ulike grunnar til at ein person døyr av narkotika som kroppen ikkje toler. Det kan vere tilfeldig og utgjere store hopp i statistikken utan at det er ein stor grunn til det, strekar Anundsen under. (©NPK)