Bedehus i Bergen blir tyrkisk moske

– Vi kunne knapt kjøpt ein betre bygning, seier styreleiar Adem Guven i Bergen muslimske foreining til Bergens Tidende.

Den nye moskeen i Nesttunvegen vart kjøpt for 4,2 millionar kroner og skal pussast opp på dugnad. Det skal lagast rom for koranundervisning og leksehjelp. Kvinnene skal gå inn hovuddøra, mens det er planlagt at mennene vil bruke det som i dag er garasjeporten som inngang. Det heile er planlagt å opne i 2017.

– At eit hus som vart reist for eit kristent føremål skal brukast til ein annan religion, skjer meg i hjartet. Men livet går vidare. Eit bygg er eit bygg, seier generalsekretær Erik Furnes i Indremisjonsforbundet. (©NPK)