Benfica-sjefen om Schjelderup: – Hans tid vil komme

Det norske supertalentet Andreas Schjelderup gjorde overgang til Benfica i januar, men har framleis til gode å få debuten sin. No forklarer trenaren kvifor.

Publisert: 08.03.2023 kl 07:43

Schjelderup blir rekna som ein av europas aller største talent og har vore jakta av alle dei største klubbane i verda i fleire år.

I januar gjekk turen frå danske Nordsjælland til portugisiske Benfica. Overgangen skal ifølgje Transfermarkt ha kosta portugisarane over 100 millionar kroner.

Likevel står 18-åringen utan eitt einaste minutt for A-laget sidan overgangen for to månader sidan.

– Hans tid vil komme. Han er ein strålande spelar og eit strålande talent, sa Benfica-trenar Roger Schmidt til TV 2.

– Akkurat no må eg bruke heile stallen, vi har mange spelarar som har jobba hardt for å få oss hit. Eg skulle gjerne brukt alle innbytarane, men det er umogleg. Hans tid vil komme, heldt tyskaren fram.

Tysdag tok Benfica seg komfortabelt vidare til kvartfinalen i Champions League etter å ha knust Club Brugge 7–1 over to kampar.

(©NPK)

Andreas Schjelderup har framleis til gode å debutere for Benfica. Foto: Claus Fisker / Ritzau scanpix / NTB